Prokuroria Evropiane (EPPO) ka dërguar në Parlamentin grek një dosje të gjerë hetimore që lidhet me një skandal të madh mashtrimi me fondet bujqësore të Bashkimit Europian.
Sipas raportimeve, prokuroria ka kërkuar heqjen e imunitetit për 11 deputetë aktivë, ndërsa nën hetim janë edhe 5 ish-deputetë, të dyshuar për përfshirje direkte ose indirekte në skemën e abuzimit me fondet.
Hetimi përfshin ngjarje të vitit 2021 dhe lidhet me disa vepra penale, si:
- mashtrim kompjuterik
- shpërdorim detyre
- falsifikim dokumentesh për përfitime të paligjshme
Gjithashtu, në dosje përmendet përfshirja e mundshme e një ish-ministri dhe një ish-zëvendësministri të Bujqësisë.
Ky zhvillim përbën një goditje të fortë politike për qeverinë e kryeministrit Kyriakos Mitsotakis, pasi skandali prek nivele të larta të administratës dhe politikës.
Megjithatë, hetimi është përballur me pengesa ligjore në Greqi. Sipas Kushtetutës, ministrat dhe ish-ministrat gëzojnë një formë mbrojtjeje penale për veprimet gjatë ushtrimit të detyrës, çka e ka detyruar prokurorinë të ndajë procedimin dhe t’ia kalojë një pjesë të çështjes Parlamentit.
Tashmë, vendimi përfundimtar i takon Parlamentit grek, i cili duhet të vendosë nëse do të heqë imunitetin e deputetëve dhe do t’i hapë rrugë hetimeve të plota, apo do të mbrojë zyrtarët e përfshirë në këtë skandal që konsiderohet ndër më të mëdhenjtë me fondet e BE-së në vend.
