Një zjarr i fuqishëm i shoqëruar me shpërthim ka shkatërruar Qendrën e Shëndetit dhe Rehabilitimit në Bristol Township, në periferi të Filadelfias, duke shkaktuar një tragjedi të rëndë. Sipas autoriteteve lokale, dyshohet se shkaku i incidentit ka qenë një rrjedhje gazi.
Ekipet e zjarrfikësve dhe shërbimeve të emergjencës reaguan menjëherë, duke ndërmarrë një operacion të vështirë evakuimi për të nxjerrë të moshuarit nga godina në flakë. Të moshuarit u evakuuan përmes dritareve, shkallëve dhe ashensorëve, në kushte tejet të rrezikshme.
Guvernatori i Pensilvanisë, Josh Shapiro, konfirmoi se dy persona kanë humbur jetën, ndërsa pesë të tjerë rezultojnë ende të zhdukur. Numri i të plagosurve nuk është ende i saktë, pasi shumë prej banorëve të azilit janë transportuar në spitale të ndryshme për trajtim mjekësor.
Shefi i zjarrfikësve, Kevin Dippolito, e përshkroi shpërthimin si “jashtëzakonisht katastrofik”, duke theksuar se rreth 15–30 sekonda pasi zjarrfikësit dolën nga ndërtesa, ndodhi një shpërthim i dytë i fuqishëm, i cili rrezikoi seriozisht jetën e ekipeve të shpëtimit.
Si pasojë e zjarrit dhe shpërthimit, kati i parë i ndërtesës u shemb pjesërisht në bodrum. Autoritetet vlerësuan përpjekjet heroike të policëve, zjarrfikësve dhe banorëve të zonës, të cilët ndihmuan në nxjerrjen e të moshuarve nga dritaret, shpesh duke i mbajtur mbi supe për t’i çuar në vende të sigurta. Një oficer policie u përmend veçanërisht për guximin e treguar, pasi arriti të shpëtojë dy persona duke i transportuar vetë jashtë rrezikut.
Shkolla e Mesme “Harry S. Truman” është vënë në dispozicion si qendër e përkohshme strehimi për personat e evakuuar. Autoritetet bëjnë me dije se shpërthimi i dytë ndihmoi në identifikimin e burimit të rrjedhjes së gazit në bodrum, duke parandaluar përhapjen e mëtejshme të rrezikut.
Guvernatori Shapiro falënderoi dhe vlerësoi reagimin e shpejtë dhe profesional të ekipeve të emergjencës, duke e cilësuar atë vendimtar për shpëtimin e shumë jetëve.
Qendra e të moshuarve kishte ndërruar pronësi vetëm pak javë më parë, ndërsa Departamenti i Shëndetësisë së Pensilvanisë kishte përgatitur një plan për përmirësimin e standardeve të sigurisë në objekt. Hetimet për shkaqet e sakta të shpërthimit dhe fatin e personave të zhdukur vijojnë.
