Kuvendi i Parë Kombëtar Qytetar, i organizuar në kuadër të lëvizjes protestuese në Tiranë, është shoqëruar me debate dhe kundërshtime që në momentet e para të zhvillimit të tij.
Gjatë takimit, disa pjesëmarrës shprehën pakënaqësi për mënyrën e organizimit të mbledhjes, duke pretenduar se nuk ishin njoftuar paraprakisht për zhvillimin e aktivitetit dhe se në sallë mungonin përfaqësues të protestuesve që kanë marrë pjesë në marshimet e ditëve të fundit.
Një prej pjesëmarrësve deklaroi se nuk e konsideronte përfaqësues përbërjen e të pranishmëve, ndërsa ngriti shqetësimin për mungesën e informimit mbi organizimin e kuvendit.
Nga ana tjetër, organizatorët kërkuan respektimin e rendit të ditës, duke theksuar se diskutimet do të zhvilloheshin sipas programit të miratuar dhe se ndërhyrjet jashtë procedurës nuk do të lejoheshin.
Moderatorja e aktivitetit deklaroi se kuvendi është i hapur për të gjithë qytetarët dhe se synon të shërbejë si një forum diskutimi për pjesëmarrësit e lëvizjes qytetare.
Takimi vijon mes diskutimeve dhe debateve, ndërsa mbetet për t’u parë nëse organizatorët dhe pjesëmarrësit do të arrijnë një dakordësi mbi mënyrën e zhvillimit të punimeve të kuvendit.
