Një tjetër incident është regjistruar brenda Partisë Socialiste gjatë turit të kryeministrit Edi Rama në Asambletë e Tiranës, ku protagonist këtë herë është deputeti Erion Braçe.
Sipas raportimeve, gjatë një mbledhjeje në njësinë nr. 7, Braçe nuk është lejuar të hyjë në takim nga Garda, me arsyetimin se aktiviteti kishte nisur më herët se orari i njoftuar.
Ngjarja vjen vetëm pak ditë pasi Braçe ka shprehur publikisht ambicien për të kandiduar për Bashkinë e Tiranës, duke kërkuar një proces statutor brenda partisë për përzgjedhjen e kandidatit.
Ky është rasti i dytë brenda pak ditësh që Garda ndërhyn ndaj figurave të Partisë Socialiste që po cilësohen si “rebelë”. Më herët, edhe deputetja Elisa Spiropali u ndalua në një incident të ngjashëm, teksa tentonte të hynte në Kuvend nga një hyrje tjetër për të shmangur mediat.
Nga ana tjetër, vetë Braçe ka sqaruar se mungesa e tij në disa takime të tjera ka qenë për shkak të angazhimeve paralele dhe jo për arsye përjashtimi apo konflikti të drejtpërdrejtë.
Ai ka theksuar gjithashtu se deri tani nuk ka pasur asnjë reagim nga kryeministri Rama lidhur me synimin e tij për të garuar për drejtimin e Bashkisë së Tiranës, ndërsa ka kërkuar që procesi të jetë i hapur dhe në përputhje me rregullat e partisë.
Ngjarjet e fundit duket se reflektojnë tensione të brendshme në radhët e socialistëve, në prag të përgatitjeve për zgjedhjet vendore.
