Sekretari i Përgjithshëm i Partisë së Lirisë, Tedi Blushi, ka akuzuar kryeministrin Edi Rama për shpërdorim të fondeve publike, duke pretenduar se 4.2 milionë euro nga buxheti i shtetit janë përdorur për financimin e një koncerti privat.
Në një deklaratë për mediat, Blushi tha se fondet duhej të përdoreshin për pensionistët, familjet në nevojë, fermerët, spitalet, arsimin dhe shërbime të tjera publike.
Sipas tij, përdorimi i parave nga fondi i emergjencave për këtë aktivitet nuk justifikohet as ligjërisht dhe as moralisht.
“Ky fond ekziston për zjarret, përmbytjet, tërmetet dhe fatkeqësitë e tjera, jo për propagandën e qeverisë”, deklaroi Blushi.
Ai e cilësoi vendimin si një shembull të keqmenaxhimit të financave publike dhe pretendoi se aktiviteti u përdor për qëllime propagandistike.
Blushi kritikoi gjithashtu SPAK-un për mungesë reagimi dhe kërkoi nisjen e menjëhershme të hetimeve për procedurën e ndjekur, institucionet që kanë miratuar pagesën dhe zyrtarët që kanë firmosur vendimin.
“Hetuesit e SPAK-ut duhet të sekuestronin çdo dokument dhe të verifikonin çdo zyrtar që ka autorizuar, miratuar apo ekzekutuar këtë shpenzim”, u shpreh ai.
Në përfundim, përfaqësuesi i Partisë së Lirisë tha se përdorimi i fondeve publike duhet t’i nënshtrohet kontrollit të plotë ligjor dhe institucional.
Akuzat e Blushit përbëjnë qëndrime politike dhe deri tani nuk ka një përfundim zyrtar nga organet e drejtësisë që të konfirmojë se në këtë rast është kryer vepër penale.
