Kryetari i Lidhjes Demokratike të Kosovës, Lumir Abdixhiku, ka deklaruar se nuk është arritur asnjë marrëveshje për çështjen e presidentit pas takimit me kryeministrin Albin Kurti.
Në një prononcim për mediat, Abdixhiku theksoi se diskutimet nuk sollën ndonjë progres konkret dhe se nuk ka pasur zhvillime të reja në këtë drejtim.
Sipas tij, palët kanë në dispozicion më pak se tre javë për të arritur një konsensus, përndryshe vendi mund të shkojë në zgjedhje.
“Nuk kemi ndonjë të re. Diskutuam për afatin kohor, kemi më pak se 3 javë për të arritur një marrëveshje eventuale. Në të kundërtën, vendi shkon në zgjedhje,” u shpreh Abdixhiku.
Megjithatë, ai theksoi se takimet do të vijojnë në përpjekje për të gjetur një zgjidhje të përbashkët mes palëve politike.
Situata mbetet e paqartë, ndërsa mungesa e konsensusit rrit presionin politik në Kosovo dhe afati kohor për një marrëveshje po ngushtohet.
