Tabaku jep alarmin: Grupet kriminale po marrin tenderat publikë, kompanitë që ndërtojnë në Tiranë s’mund të jenë të lidhura me zyrtarë të lartë

Deputetja e PD-së Jorida Tabaku, në një studio televizive deklaroi se grupet kriminale po marrin tenderat publikë. Ajo thotë se kompanitë që ndërtojnë në Tiranë nuk mund të jenë me kapital zero si dhe nuk mund të kenë lidhje të ngushta me zyrtarë të lartë, por duhet që të plotësojnë disa kushte themelore. “Në këtë qeverisje korrupsioni është kulturë. Çdo ligj që kalon në parlament duhet ta ketë frymën antikorrupsion. Kompanitë që ndërtojnë në Tiranë nuk mund të jenë me kapital zero, që janë të lidhura me zyrtarë të lartë. Nuk mund të marrin statusin e investitorit strategjik të tilla kompani. Legjislacioni duhet të vendosë disa ndalesa. Kompani që nuk kanë realizuar më parë punime, kompani që vijnë nga persona me precedentë kriminal nuk mund të marrin përsipër punime, të gjitha janë sipas legjislacionit të BE-së dhe nuk u miratuan” Si dhe nga ana tjetër, këtë zallamahi, Tabaku e sheh si një veprim i cili realizohet nga grupe kriminale, të cilët veprojnë me njëri-tjetrin duke dëmtuar në mënyrë të drejtëpërdrejtë buxhetin e shtetit. “Ky duhet të jetë fokusi, çrrënjosja e kësaj kulture. Këtu bëhet fjalë për grupe kriminale. Sepse kur pesë persona bashkëpunojnë me njëri-tjetrin për ta dëmtuar buxhetin e shtetit, bëhet fjalë për grup të strukturuar kriminal. Dhe kur operon nën kryetarin e bashkisë, i bie që është ose i paaftë ose budalla, se rezulton që nuk ka marrë vesh asgjë çfarë ka ndodhur.  Është i pabesueshëm korrupsioni në institucione publike. Kush ia kthen buxhetit të shtetit miliona euro të inceneratorëve? Shumë kompani nuk fitojnë dot një tender, sepse ekziston nepotizmi dhe fitojnë kompani të caktuara. Fatkeqësisht korrupsioni është kthyer në kulturë”, shprehet Tabaku.