Qyteti i Sydney-t e ka mirëpritur Vitin e Ri 2026 me spektaklin e tij tradicional të fishekzjarrëve, por këtë herë nën masa të rrepta sigurie dhe me një ton solemn përkujtimor. Festimet u zhvilluan vetëm disa javë pas sulmit tragjik në zonën e Bondit, ku humbën jetën 15 persona gjatë një eventi hebraik.
Spektakli madhështor përfshiu rreth 40 mijë efekte piroteknike të shtrira përgjatë portit, me kulmin mbi Urën ikonike dhe Operan e Sydney-t. Para nisjes së fishekzjarrëve u mbajt një minutë heshtje në nderim të viktimave, ndërsa Ura e Portit u ndriçua me dritë të bardhë dhe u projektua simbolikisht një menorah, si shenjë solidariteti dhe kujtese.
Kryetarja e bashkisë theksoi se, pas një fundviti të dhimbshëm, nata e Vitit të Ri ishte një thirrje për bashkim, shpresë dhe paqe, duke ftuar qytetarët ta shohin vitin 2026 me më shumë optimizëm dhe mirëkuptim.
Autoritetet australiane dyshojnë se sulmi i dhjetorit u krye nga një baba dhe djali i tij, duke e cilësuar atë si incidentin më të rëndë me armë zjarri në vend në gati tri dekada. Si pasojë, gjatë festimeve u angazhuan rreth 3 mijë efektivë policie, disa prej tyre të armatosur, ndërsa një sërë aktivitetesh u anuluan ose u zhvilluan në formë më të kufizuar.
Kryeministri i Uellsit të Ri Jugor deklaroi se qyteti nuk do të frikësohet dhe nuk do të ndryshojë mënyrën e jetesës përballë dhunës, duke nënvizuar vendosmërinë për të mbrojtur sigurinë dhe vlerat e bashkëjetesës.
