Një sulm i armatosur në një universitet në shtetin amerikan të Virxhinias është klasifikuar si akt terrorist nga autoritetet federale. Nga ngjarja mbeti i vrarë një person dhe dy të tjerë u plagosën.
Sipas FBI-së, sulmi ndodhi në Old Dominion University, në qytetin Norfolk, brenda një salle ku zhvillohej programi i trajnimit për oficerë rezervë (ROTC). Autori hyri në klasë dhe hapi zjarr ndaj personave që ndodheshin brenda.
Viktima është identifikuar si nënkoloneli Brandon Shah, instruktor ushtarak në universitet. Guvernatorja e Virxhinias, Abigail Spanberger, deklaroi se ai ishte një instruktor i përkushtuar që kishte frymëzuar shumë studentë të ndiqnin shërbimin ndaj vendit.
Sipas zyrtarëve të FBI-së, autori u neutralizua nga disa studentë të programit ROTC që ndodheshin në sallë. Ata arritën ta vënë nën kontroll dhe të ndalojnë sulmin përpara se të kishte më shumë viktima.
Autoritetet identifikuan sulmuesin si 36-vjeçarin Mohamed Bailor Jalloh, ish-anëtar i Gardës Kombëtare të Virxhinias. Ai kishte precedent penal pasi në vitin 2016 ishte shpallur fajtor për tentativë mbështetjeje ndaj organizatës terroriste ISIS dhe ishte dënuar me 11 vite burg.
Jalloh ishte liruar nga burgu në vitin 2024. Para se të hapte zjarr, ai thuhet se bërtiti “Allahu Akbar”.
Drejtori i FBI-së, Kash Patel, konfirmoi se nga sulmi mbeti i vrarë një person dhe dy të tjerë u plagosën, duke theksuar se ndërhyrja e studentëve dhe reagimi i shpejtë i autoriteteve ndihmuan në shmangien e një tragjedie edhe më të madhe.
Hetimet për motivet dhe rrethanat e plota të sulmit janë ende në vijim.
