Ministrja për Europën dhe Punët e Jashtme, Elisa Spiropali, mori pjesë në takimin e Ministrave të Jashtëm të NATO-s të zhvilluar në selinë e Aleancës në Bruksel, ku u diskutuan sfidat aktuale të sigurisë në Euro-Atlantik dhe prioritetet strategjike të vendeve anëtare.
Shqipëria riafirmon rolin si aleat i qëndrueshëm dhe i besuar
Në deklaratën e saj pas takimit, Spiropali theksoi se ky ministërial konfirmoi unitetin dhe angazhimin e përbashkët të NATO-s përballë kërcënimeve të sigurisë, duke nënvizuar se Shqipëria mbetet një aleat i besueshëm në forcimin e sigurisë kolektive.
“Takimi i Ministrave të Jashtëm të NATO-s përcolli mesazhin e qartë të angazhimit strategjik të Aleancës sonë përballë sfidave të sigurisë. Shqipëria mbetet një partner i palëkundur dhe i përkushtuar për forcimin e sigurisë kolektive,” u shpreh Spiropali.
Korridori VIII – një arterie strategjike për lëvizjen e trupave dhe pajisjeve
Ministrja vuri theks të veçantë te roli i Korridorit VIII, i cili po konsiderohet gjithnjë e më shumë si një element kyç i gatishmërisë dhe mobilitetit ushtarak në rajon.
“Shqipëria rikonfirmon angazhimin për mobilitetin ushtarak dhe rolin qendror të Korridorit VIII si arterie strategjike e gatishmërisë së NATO-s,” deklaroi ajo.
Ky korridor, që lidh Adriatikun me Detin e Zi përmes Shqipërisë, Maqedonisë së Veriut dhe Bullgarisë, shihet nga Aleanca si infrastrukturë themelore për lëvizjen e shpejtë të trupave, pajisjeve ushtarake dhe logjistikës në rast krizash.
Modernizimi i infrastrukturës dhe procedurave
Spiropali nënvizoi se Shqipëria dhe aleatët janë të përkushtuar në avancimin e kapaciteteve infrastrukturore dhe procedurale që kërkon mobiliteti modern ushtarak.
“Ne dhe aleatët mbetemi të përkushtuar në modernizimin e infrastrukturës, harmonizimin e procedurave dhe rritjen e kapaciteteve për lëvizje të shpejtë – një kontribut konkret për sigurinë kolektive të Aleancës,” u shpreh ajo.
Takimi për Korridorin VIII dhe roli i Shqipërisë si organizatore
Gjatë qëndrimit në Bruksel, ministrja pritet të marrë pjesë edhe në takimin e vendeve nënshkruese të Letër-Marrëveshjes për Korridorin VIII. Diskutimet do të fokusohen te rëndësia strategjike e rritjes së mobilitetit ushtarak në rajon.
Pritet gjithashtu që Shqipëria të propozojë zhvillimin e një takimi ministerial të vendeve të përfshira në Korridor, që mund të mbahet në fillim të vitit të ardhshëm në Tiranë.
