Që prej orës 11:00 të paradites, qarkullimi në aksin e rrugës kombëtare Librazhd–Prrenjas është bllokuar plotësisht, duke shkaktuar kaos dhe radhë të gjata automjetesh në të dy drejtimet. Shkak për situatën e rëndë janë bërë rrëshqitjet masive të gurëve dhe shkëmbinjve, me dhjetëra e qindra metra kub materiale inerte, që kanë rënë mbi trasenë e rrugës në zonën e njohur si “Kthesat e Dragostunjës”.
Situata paraqitet alarmante, pasi masat e mëdha shkëmbore kanë pushtuar tërësisht segmentin rrugor, duke e bërë të pamundur kalimin e mjeteve dhe duke vënë seriozisht në rrezik jetën e drejtuesve të automjeteve. Qindra qytetarë kanë mbetur të bllokuar për orë të tëra në një nga arteriet më të rëndësishme kombëtare që lidh Librazhdin me juglindjen e Shqipërisë.
Në terren ndodhen forca të Policisë Rrugore, të cilat po monitorojnë situatën dhe po përpiqen të menaxhojnë trafikun, por pa asnjë zgjidhje konkrete. Mungesa e mjeteve të rënda dhe e ndërhyrjeve teknike për largimin e masiveve të gurëve e ka bërë të pamundur normalizimin e qarkullimit.
Ndërkohë, kompania që po kryen punimet për zgjerimin e rrugës Librazhd–Dragostunjë–Hotolisht, e cila sipas burimeve në terren konsiderohet shkaktare direkte e kësaj situate, nuk ka ndërmarrë asnjë veprim për pastrimin e rrugës dhe rikthimin e qarkullimit. Sipas dëshmive, kompania mungon plotësisht në terren, duke lënë pas pasoja të rënda për qarkullimin dhe sigurinë rrugore.
Kjo neglizhencë po rrezikon paralizimin për shumë orë të këtij aksi jetik, ndërsa indinjata e drejtuesve të mjeteve dhe banorëve të zonës po rritet. Qytetarët kërkojnë ndërhyrje të menjëhershme nga institucionet përgjegjëse, pasi përveç bllokimit total të qarkullimit, ekziston një rrezik real për aksidente të rënda nëse rrëshqitjet vijojnë ose nëse mjetet tentojnë të kalojnë në kushte të pasigurta.
Situata mbetet kritike dhe kërkon reagim urgjent përpara se të përshkallëzohet më tej.
