Një tjetër incident i rëndë rrugor është regjistruar në zonën e ish-kënetës në Durrës, vetëm pak javë pas aksidentit tragjik ku humbën jetën dy fëmijë.
Policia e Shtetit arrestoi 44-vjeçarin Rezart Abazaj, pasi u kap duke drejtuar automjetin në gjendje të dehur dhe duke kryer manovra të rrezikshme në rrugë.
Sipas policisë, patrulla i ishte vënë në ndjekje pas sinjalizimeve nga banorët se një automjet po lëvizte me shpejtësi të lartë në zonë. Gjatë tentativës për ta ndaluar, shoferi u përplas me automjetin e policisë.
Pas testit të alkoolit, Abazaj rezultoi me nivel 1.4 mg/l alkool në ajrin e nxjerrë, ndërsa burime policore bëjnë me dije se ai është përsëritës për shkelje të tilla.
Ngjarja riktheu vëmendjen tek aksidenti tragjik i 3 majit në lagjen nr.15 të Durrësit, ku 57-vjeçari Nikoll Radaçi, në gjendje të dehur, humbi kontrollin e automjetit dhe përplasi tre fëmijë që po luanin pranë trotuarit.
Si pasojë e atij aksidenti humbën jetën dy të mitur, 12-vjeçari E.M. dhe 10-vjeçari K.N., ndërsa një tjetër fëmijë 8-vjeçar mbeti i plagosur rëndë.
Sipas raportimeve, Radaçi ishte denoncuar më herët nga banorët për drejtim të rrezikshëm të automjetit dhe ishte gjobitur disa herë për shkelje të rregullave të qarkullimit rrugor.
