Filipinet, një nga partnerët më të rëndësishëm të Shteteve të Bashkuara në Azi, vazhdon të ndërtojë ushtrinë e saj për të frenuar lëvizjet e Kinës në ujërat e diskutueshme të Detit të Kinës Jugore. Në orët e fundit, Marina e Manilës ka përfunduar blerjen e dy luftanijeve të avancuara nga Koreja e Jugut: BRP Miguel Malvar 3200 tonësh dhe B RP Diego Silang. Shefi i Marinës së Filipineve, Zëvendësadmirali Jose Ma, Ambrosio Ezpeleta konfirmoi mbërritjen e afërt të anijes së parë në fillim të muajit të ardhshëm, duke thënë se e dyta do të dorëzohej më vonë këtë vit. Të dyja anijet, të klasifikuara si fregata me raketa të drejtuara, janë më shumë se 100 metra të gjata dhe kanë aftësi anti-nëndetëse dhe kundërajrore.
Ato janë rezultat i një marrëveshjeje prej 28 miliardë pesos Filipine (rreth 483 milionë dollarë ) që Departamenti i Mbrojtjes Kombëtare i vendit nënshkroi me ndërtuesin e anijeve koreano-jugore HD Hyundai në 2021. Dy anijet luftarake të blera rishtazi nga Filipinet janë pjesë e përpjekjeve të Manilës për të zgjeruar shtrirjen e saj ushtarake përtej zonës ekskluzive ekonomike të vendit, një qëllim që kërkon një forcë detare më të madhe dhe më të avancuar për të mbrojtur territorin e gjerë detar nga inkursionet rivale, raportoi “South China Morning Post”.
Në janar të vitit të kaluar, Presidenti Ferdinand Marcos Jr. miratoi një program të ri modernizimi ushtarak, Re-Horizon 3 , i cili ndau 35 miliardë dollarë për forcat e armatosura. Kujtojmë se Pekini pretendon pothuajse të gjithë Detin e Kinës Jugore dhe se Dragoi ka marrë masa agresive për të penguar misionet e Marinës dhe Gardës Bregdetare të Filipineve, për të kërkuar të drejtat e tij territoriale mbi ujërat e diskutueshme.
