Sekretari i Përgjithshëm i NATO-s, Mark Rutte, është shprehur i bindur se aleanca do të arrijë të rihapë Ngushticën e Hormuzit, në mes të tensioneve të larta në Lindjen e Mesme.
Në një intervistë për Fox News, Rutte deklaroi se vendet anëtare dhe partnerët e NATO-s po punojnë për një përgjigje të përbashkët, duke theksuar se koordinimi kërkon kohë për shkak të natyrës së ndjeshme të operacioneve ushtarake.
“Aleatët dhe partnerët evropianë kanë përdorur javët e fundit për t’u bashkuar dhe për të planifikuar se çfarë mund të bëjmë kolektivisht”, u shpreh ai.
Rutte gjithashtu e cilësoi ndërhyrjen amerikane si “thelbësore”, duke e lidhur atë me atë që ai e quajti një “kërcënim ekzistencial” nga Irani.
Deklarata vjen në një moment kritik, ndërsa Ngushtica e Hormuzit mbetet një pikë kyçe për furnizimin global me energji dhe një nga zonat më të ndjeshme të krizës aktuale.
