Shtetet e Bashkuara parashikojnë që lufta kundër Iranit të përfundojë brenda javëve të ardhshme, ndërsa tensionet në Lindjen e Mesme vazhdojnë të ndikojnë në tregjet globale të energjisë.
Sekretari amerikan i Energjisë, Chris Wright, deklaroi se bllokimi i Ngushticës së Hormuzit është një shqetësim i përkohshëm dhe se situata do të stabilizohet në një periudhë relativisht të shkurtër.
Në një intervistë për emisionin “This Week” në ABC News, Wright tha se ndërhyrja ushtarake kundër Iranit ishte e nevojshme për të parandaluar zhvillimin e armëve bërthamore nga Teherani.
“Është e vërtetë që po kalojmë një periudhë shqetësimesh afatshkurtra, por është më mirë të ndodhte tani sesa të përballeshim me një Iran me armë bërthamore”, u shpreh ai.
Ai shtoi se konflikti pritet të përfundojë brenda javëve të ardhshme, madje edhe më shpejt, duke theksuar se pas përfundimit të luftës pritet një rritje e furnizimit me hidrokarbure dhe një ulje e çmimeve të energjisë.
Ngushtica e Hormuzit është një nga rrugët detare më të rëndësishme në botë për transportin e naftës, pasi përmes saj kalon rreth 20% e prodhimit global të hidrokarbureve.
Wright rikonfirmoi gjithashtu qëndrimin e administratës së presidentit Donald Trump, duke hedhur poshtë kritikat se planet ushtarake të SHBA-së kishin nënvlerësuar rrezikun e një mbylljeje të mundshme të kësaj ngushtice strategjike nga Irani.
