Kreu i Partisë Demokratike, Sali Berisha, ka lëshuar akuza të reja ndaj kryeministrit Edi Rama, duke pretenduar se zyra e këtij të fundit është shndërruar në një pikë takimi për përfaqësues të grupeve kriminale ndërkombëtare.
Në deklaratën e tij, Berisha u shpreh se në ambientet e kryeministrisë priten dhe përcillen persona të lidhur me kartele droge, duke përmendur konkretisht edhe kartelin e njohur të Sinaloas. Sipas tij, kjo situatë tregon një lidhje të drejtpërdrejtë mes qeverisë dhe krimit të organizuar.
Ai përmendi gjithashtu emrin e Ergys Agasi, për të cilin tha se ka rol koordinues me grupe kriminale dhe se, sipas pretendimeve të tij, qëndron më shpesh në Surrel sesa në Xhafzotaj.
Deklaratat e Berishës vijnë në vijim të akuzave të tij të vazhdueshme ndaj qeverisë për lidhje me krimin, ndërsa deri tani nuk ka një reagim zyrtar nga Edi Rama apo personat e përmendur lidhur me këto pretendime.
