Shqipëria ka dënuar ashpër sulmet e fundit të Rusia ndaj Ukraina, pasi një prej goditjeve ka prekur kompleksin rezidencial ku banon ambasadori shqiptar në Kiev.
Lajmi është bërë publik nga Ministria për Evropën dhe Punët e Jashtme, e cila theksoi se jeta e diplomatit shqiptar është vënë në rrezik serioz, duke e cilësuar ngjarjen si “të papranueshme”.
Ministri Ferit Hoxha deklaroi se sulmet masive me raketa balistike dhe dronë ndaj objektivave civile përbëjnë një tjetër përshkallëzim të rëndë të agresionit rus.
“Këtë herë u godit kompleksi rezidencial ku banon Ambasadori i Shqipërisë në Ukrainë, duke e vënë jetën e tij në rrezik serioz. Kjo është e papranueshme”, thuhet në reagimin zyrtar të ministrisë.
Shqipëria theksoi se shënjestrimi i zonave civile dhe rrezikimi i personelit diplomatik bie ndesh me ligjin ndërkombëtar dhe përbën dëshmi të kostos njerëzore të luftës.
Në reagim nënvizohet se Rusia, pavarësisht sulmeve të vazhdueshme ndaj infrastrukturës energjetike, shkollave, spitaleve dhe banesave në Ukrainë, nuk ka arritur të thyejë rezistencën e popullit ukrainas.
“Rusia nuk po fiton; ajo vetëm po vret, po nxit vuajtje dhe shkatërrim”, deklaron ministria shqiptare.
Tirana zyrtare i bëri thirrje Moskës të ndalojë menjëherë sulmet, të respektojë ligjin ndërkombëtar dhe të rikthehet në negociata për përfundimin e konfliktit.
Ndërkohë, Ministria e Jashtme bëri të ditur se ambasadori i Federata Ruse në Shqipëri është thirrur për të dhënë shpjegime lidhur me incidentin.
