Kryeministri Edi Rama ka zhvilluar një bashkëbisedim me gazetarë të mediave europiane në Kryeministri, ku është pyetur edhe për protestat e fundit kundër projektit në Zvërnec dhe ndikimin që ato mund të kenë në procesin e integrimit europian të Shqipërisë.
Gjatë diskutimit, një prej gazetarëve ngriti çështjen e deklaratave të Komisionit Europian dhe pyeti nëse protestat e vazhdueshme mund të ndikojnë në rrugën e vendit drejt Bashkimit Europian.
Rama e hodhi poshtë një lidhje të tillë, duke theksuar se protestat janë pjesë normale e jetës demokratike dhe se Shqipëria nuk ndryshon nga vendet e tjera europiane në këtë drejtim.
“Nuk ka të bëjë fare me integrimin. Përkundrazi, kjo tregon se jemi një vend si çdo vend i Bashkimit Europian, ku qytetarët protestojnë dhe shprehin lirisht qëndrimet e tyre”, u shpreh kryeministri.
Kur gazetari iu referua pretendimit se Komisioni Europian kishte lënë të kuptohej se vazhdimi i protestave mund të kishte pasoja për procesin e integrimit, Rama reagoi me habi dhe kërkoi sqarime.
“Cili Komision ua thotë këto gjëra? Sepse unë nuk i kam dëgjuar. Nuk mendoj se ekziston ndonjë Komision Europian që të thotë se nëse protestat vazhdojnë, atëherë vendi nuk është europian”, deklaroi ai.
Kryeministri theksoi se protesta është një e drejtë themelore demokratike dhe se zhvillimi i saj nuk mund të konsiderohet pengesë për procesin e anëtarësimit në Bashkimin Europian.
Debati me gazetarët europianë vjen në një moment kur çështja e investimit të planifikuar në zonën e Zvërnecit ka shkaktuar reagime të shumta publike, ndërsa autoritetet shqiptare dhe institucionet europiane kanë shkëmbyer qëndrime mbi aspektet mjedisore dhe procedurale të projektit.
