Kryeministri Edi Rama ka zhvilluar një seri takimesh intensive në “Vilën 30”, menjëherë pas Asamblesë së Partisë Socialiste, duke mbledhur ministra, zëvendësministra dhe drejtues institucionesh në një analizë të gjerë të punës së qeverisë.
Takimet, që nisën në orët e para të mëngjesit dhe zgjatën deri pranë mesditës, u fokusuan në prioritetet e çdo dikasteri dhe problematikat kryesore në administratë. Në fillim të takimeve ishte ministri i Brendshëm Besfort Lamallari, ndërsa më pas iu bashkuan edhe ministri i Drejtësisë Toni Gogu, përfaqësues të pushtetit vendor dhe drejtues të tjerë të rëndësishëm.
Në këto mbledhje morën pjesë edhe drejtues të institucioneve kyçe, përfshirë kreun e AKSHI-t, Igli Tafa, në një kohë kur ky institucion është në qendër të vëmendjes për çështje që lidhen me tendera dhe hetime në drejtësi.
Burime nga takimi bëjnë me dije se Rama ka mbajtur një qëndrim kritik ndaj disa sektorëve, veçanërisht ndaj Ministrisë së Brendshme dhe strukturave në varësi të saj, duke kërkuar rritje të performancës dhe përgjegjshmërisë.
Këto zhvillime vijnë pas ndryshimeve të fundit në Asamblenë e PS, ku u emëruan drejtues të rinj politikë në disa qarqe, si pjesë e një riorganizimi të brendshëm me synim forcimin e strukturave dhe përmirësimin e rezultateve elektorale.
Nga ana tjetër, kreu i grupit parlamentar socialist Taulant Balla paralajmëroi ndryshime të mëtejshme, këtë herë në nivel vendor. Sipas tij, Partia Socialiste do të nisë një proces “rifreskimi” të drejtuesve në shumicën e bashkive, përmes një gare konkurruese.
Ky proces pritet të shoqërohet me përgatitje për zgjedhjet vendore të ardhshme, ndërsa sinjalet nga mazhoranca tregojnë për një fazë të re ristrukturimi të brendshëm.
Lëvizjet e fundit brenda PS-së dhe mbledhjet e njëpasnjëshme të qeverisë sugjerojnë se mazhoranca po hyn në një periudhë intensive reformimi dhe kontrolli të brendshëm, në një moment të ndjeshëm politik dhe institucional.
