Gjykata e Posaçme kundër Korrupsionit dhe Krimit të Organizuar (GJKKO) ka vendosur të lërë në fuqi masën e sigurisë për ish-Presidentin Ilir Meta, duke rrëzuar kërkesën e tij për lirimin nga qelia kundrejt një garancie financiare prej 50 mijë euro.
Seanca u zhvillua pa praninë e Metës, i cili u përfaqësua nga avokatët e tij. Mbrojtja argumentoi se nuk ekziston rrezik për prishje provash apo intimidim dhe kërkoi zëvendësimin e masës së sigurisë, por gjykata vendosi ta mbajë në paraburgim. Avokati Kujtim Cakrani paralajmëroi se vendimi do të ankimohet, duke ngritur edhe akuza për parregullsi në proces.
Meta mbahet në burg që prej tetorit 2024 dhe përballet me akuza për korrupsion, pastrim parash dhe fshehje pasurie, në një çështje që tashmë ka kaluar për gjykim në themel.
Ndërkohë, në një tjetër seancë në GJKKO për dosjen e kryebashkiakut të Tiranës Erion Veliaj, u vendos pezullimi i afateve të paraburgimit për të, si dhe për disa të pandehur të tjerë.
Seanca u shoqërua me debate të forta mes prokurorëve të SPAK dhe mbrojtjes, kryesisht për çështjen e administrimit të akteve hetimore. Gjykata pranoi si avokat mbrojtës ish-deputetin Plarent Ndreca, pavarësisht kundërshtimeve të prokurorisë që argumentoi se ai ishte marrë në pyetje më herët si person në dijeni.
Prokurorët pretenduan se Veliaj kishte refuzuar të merrte dokumentacionin hetimor dhe kishte shfaqur sjellje kundërshtuese ndaj hetuesve, ndërsa mbrojtja këmbënguli se procedura e dorëzimit të akteve nuk ishte ndjekur siç duhet.
Gjykata rrëzoi kërkesën për ripërsëritjen e procedurës së dorëzimit të akteve, duke argumentuar se ato janë dorëzuar dhe regjistruar sipas ligjit. Seanca e radhës është caktuar më 1 prill.
Veliaj ndodhet në arrest që prej shkurtit 2025 dhe akuzohet për disa vepra penale, përfshirë korrupsion pasiv, pastrim parash dhe shpërdorim detyre. Në të njëjtën dosje përfshihet edhe bashkëshortja e tij dhe disa biznesmenë.
Autoritetet theksojnë se të gjithë personat e përfshirë prezumohen të pafajshëm deri në një vendim të formës së prerë.
