Pas shkarkimit të zëvendësministrit Andi Mahila, Këshilli i Ministrave ka vendosur të lirojë nga detyra edhe një tjetër numër dy në Ministrinë e Punëve të Brendshme. Në mbledhjen e zhvilluar këtë të premte, qeveria ka miratuar lirimin nga detyra të Julian Hodajt, i cili mbante postin e zëvendësministrit që prej 9 tetorit 2017.
Vendimi është marrë me propozim të Kryeministrit dhe bazohet në nenin 100 të Kushtetutës, si dhe në ligjin “Për organizimin dhe funksionimin e Këshillit të Ministrave”. Sipas njoftimit zyrtar, lirimi nga detyra hyn në fuqi menjëherë dhe do të botohet në Fletoren Zyrtare.
“Z. Julian Hodaj, zëvendësministër i Brendshëm, lirohet nga kjo detyrë. Ky vendim hyn në fuqi menjëherë dhe botohet në ‘Fletoren Zyrtare’”, thuhet në vendimin e Këshillit të Ministrave.
Ky është shkarkimi i dytë brenda një periudhe të shkurtër në nivelet drejtuese të Ministrisë së Brendshme. Pak muaj më parë, qeveria shkarkoi nga posti i zëvendësministrit edhe Andi Mahilën, pas një denoncimi të ardhur nga një qytetar shqiptar që jeton në Shtetet e Bashkuara të Amerikës.
Sipas denoncimit, Mahila kishte tymosur cigare në ambientet e një restoranti gjatë një vizite në New York, duke shkaktuar shqetësim te të pranishmit. Ministrja e Brendshme, Albana Koçiu, njoftoi largimin e tij nga detyra përmes një postimi në rrjetet sociale, duke theksuar se pas verifikimit të rastit kishte vendosur shkarkimin.
Vendimet e fundit tregojnë një riformatim të strukturave drejtuese në Ministrinë e Brendshme, ndërsa nuk janë dhënë ende detaje mbi arsyet konkrete që çuan në lirimin nga detyra të Julian Hodajt, apo nëse do të ketë emërime të reja në këto pozicione.
