Këshilli i Ministrave ka miratuar një vendim për subvencionimin e shoqërive të transportit publik me 50 lekë për çdo litër nafte, si masë për përballimin e rritjes së çmimeve të karburanteve.
Lajmi u bë i ditur nga Enea Karakaçi, i cili deklaroi se subvencioni do të përfshijë transportin qytetas, ndërqytetas dhe rrethqytetas.
Sipas ministrit, vendimi është marrë pas takimeve me shoqatat e transportit, përfaqësues të bashkive dhe institucioneve ekonomike, ku janë diskutuar shqetësimet e sektorit për rritjen e kostove operative.
“Bëhet fjalë për 50 lekë për litër për të gjitha shoqëritë e transportit publik. Këtë masë do ta fillojmë që nga muaji mars, kur nisën efektet e krizës së hidrokarbureve”, deklaroi Karakaçi.
Qeveria argumenton se masa synon të zbusë ndikimin e rritjes së çmimeve të naftës mbi operatorët e transportit publik dhe të shmangë pasoja të mëtejshme për qytetarët dhe tarifat e udhëtimit.
