Gjatë vizitës së tij zyrtare në Indi, presidenti rus Vladimir Putin ka komentuar marrëdhëniet me Shtetet e Bashkuara dhe rolin e Donald Trump në skenën ndërkombëtare. Në një intervistë për “India Today”, Putin deklaroi se ish-presidenti amerikan “ka axhendën dhe objektivat e tij, ndërsa Rusia fokusohet te interesat e saj”.
Ai vlerësoi se Trump “po vepron me mirëbesim”, por theksoi se nuk i gjykon kurrë homologët ndërkombëtarë:
“Vlerësimet u takojnë qytetarëve të tyre. As udhëheqësit me të cilët kam punuar, as ata aktualë, nuk i gjykoj — kjo është çështje e brendshme e çdo vendi”, u shpreh Putin.
Putin për Ukrainën: Zgjidhja mund të vijë vetëm nga negociatat
Sa i përket luftës në Ukrainë, kreu i Kremlinit përsëriti se konflikti mund të marrë fund vetëm përmes bisedimeve.
“Rusia nuk ia mohon Ukrainës të drejtën për siguri, por jo në kurriz të interesave tona kombëtare,” deklaroi ai.
Mesazh për SHBA-në pas tarifave ndaj naftës ruse
Putin kritikoi përpjekjet e SHBA-së për të penguar marrëdhëniet ekonomike të Rusisë me vende të tjera, duke paralajmëruar se shtetet që i bashkohen presionit amerikan “në fund përballen me humbje”.
Sipas tij, kur të kuptohen pasojat reale të këtyre politikave, “praktikat e presionit të jashtëm do të zhduken”.
Bashkëpunimi energjetik Rusi–Indi, i pandikuar
Presidenti rus theksoi se marrëdhëniet energjetike me Indinë mbeten të qëndrueshme dhe nuk preken nga tensionet globale apo ndryshimet politike.
“Tregtia e energjisë funksionon normalisht. Partnerët indianë janë seriozë dhe të besueshëm,” tha Putin.
