Protestuesit janë mbledhur para godinës së Kryeministrisë në kuadër të protestës së 37-të radhazi, duke përsëritur kërkesën e tyre për dorëheqjen e kryeministrit Edi Rama.
Pasi marshuan nga sheshi “Skënderbej”, pjesëmarrësit u vendosën në bulevardin “Dëshmorët e Kombit”, ku vijuan protestën me thirrje dhe pankarta kundër qeverisë.
Gjatë fjalës hapëse të tubimit, organizatorët theksuan se vazhdimësia e protestave tregon vendosmërinë e qytetarëve për të vijuar mobilizimin.
Sipas tyre, pjesëmarrja e përditshme në protesta ka dhënë një mesazh të qartë si për institucionet shqiptare, ashtu edhe për partnerët ndërkombëtarë.
“Ky popull e ka seriozisht,” u deklarua në hapje të tubimit, ndërsa protestuesit ritheksuan se kërkesa e tyre kryesore mbetet dorëheqja e kryeministrit Edi Rama.
Organizatorët kanë bërë thirrje që protesta të vijojë në mënyrë paqësore, ndërsa qytetarët kanë deklaruar se do të vazhdojnë tubimet deri në realizimin e kërkesave të tyre.
