Protesta e 35-të kombëtare kundër qeverisë së kryeministrit Edi Rama është shoqëruar me fjalime nga pjesëmarrësit, të cilët kanë përsëritur kërkesën për dorëheqjen e kreut të qeverisë.
Një prej protestuesve u bëri thirrje shqiptarëve të diasporës që të vijojnë të mbështesin protestën dhe, sipas mundësive, të qëndrojnë në Shqipëri për t’iu bashkuar tubimeve të përditshme.
“Nuk duhet të jemi këtu vetëm për një ditë. Protesta duhet të vazhdojë deri në realizimin e kërkesave tona. Diaspora le të qëndrojë pranë protestuesve dhe të mbështesë këtë lëvizje”, deklaroi ai nga podiumi.
Gjatë fjalës së tij, protestuesi kërkoi gjithashtu intensifikimin e aksionit qytetar, duke propozuar forma të tjera proteste, përfshirë bllokimin e institucioneve shtetërore.
“Nuk besoj se ndryshimi do të vijë vetëm me protesta simbolike. Duhet të rrisim presionin qytetar dhe të bllokojmë institucionet, sepse ato, sipas nesh, nuk po funksionojnë në interes të qytetarëve”, u shpreh ai.
Protesta u zhvillua në qendër të Tiranës, ku pjesëmarrësit përsëritën kërkesat e tyre për ndryshime politike dhe mbajtën fjalime para godinës së Kryeministrisë.
