Pas gjashtë ditësh protestash të zhvilluara në Tiranë, kundërshtimi ndaj projektit të planifikuar në zonën e Zvërnecit është zhvendosur këtë të shtunë në plazhin e Dalanit, pranë lagunës së Nartës.
Dhjetëra qytetarë dhe aktivistë janë mbledhur në zonë duke mbajtur pankarta dhe mesazhe kundër projektit, të cilin ata e konsiderojnë të dëmshëm për mjedisin dhe ekosistemin e zonës. Nga pamjet e publikuara nga mediat, numri i pjesëmarrësve duket më i ulët krahasuar me protestat e zhvilluara ditët e fundit në kryeqytet.
Protestuesit kanë deklaruar se do të vijojnë mobilizimin e tyre kundër projektit, ndërsa kërkojnë më shumë transparencë dhe konsultim publik për çdo zhvillim që prek zonat e mbrojtura dhe pasuritë natyrore.
Lëvizja protestuese nisi të shtunën e kaluar pas incidentit të ndodhur në kantierin e projektit, ku një protestues u tërhoq zvarrë gjatë një përplasjeje me punonjës të një kompanie private sigurimi. Pamjet e ngjarjes shkaktuan reagime të shumta publike dhe nxitën organizimin e protestave në Tiranë dhe qytete të tjera të vendit.
Ndërkohë, organizatorët kanë bërë të ditur se pas tubimit në plazhin e Dalanit, protestat do të vijojnë edhe në kryeqytet, ku qytetarët pritet të mblidhen sërish në orët e pasdites për të shprehur kundërshtimin e tyre ndaj projektit në Zvërnec.
