Petrit Vasili reagoi ashpër lidhur me vendimin për vijimin e masës së sigurisë ndaj Ilir Meta, duke deklaruar se vendimi unifikues i fundit i Gjykatës së Lartë ndryshon rrënjësisht mënyrën se si duhet të trajtohen masat e sigurisë.
Sipas Vasilit, barra për të justifikuar mbajtjen në burg i takon prokurorisë dhe jo mbrojtjes.
Ai kritikoi SPAK-un për pretendimin se mbrojtja nuk kishte paraqitur prova, duke theksuar se vetë vendimi unifikues i Gjykatës së Lartë përcakton qartë se gjykata duhet të arsyetojë domosdoshmërinë e masës së arrestit në çdo fazë të procesit.
“Barra e justifikimit të nevojës për caktimin dhe vijimin e masës së arrestit me burg i takon prokurorisë”, deklaroi Vasili.
Sipas tij, vendimmarrja e gjykatës nuk mund të kushtëzohet nga paraqitja ose jo e provave nga i pandehuri.
Vasili argumentoi se nuk ekziston rrezik largimi apo ndikimi mbi provat nga ana e Metës, pasi ai ka vite që nuk ushtron funksione ekzekutive.
“E ke rrëmbyer zotin Ilir Meta duke u kthyer në Shqipëri, nuk ekzistonte rreziku i largimit”, tha ai.
Ish-deputeti e cilësoi vijimin e masës së sigurisë si një “persekutim politik” dhe paralajmëroi se drejtësia selektive krijon precedent të rrezikshëm për shtetin ligjor.
“Çdo drejtësi e bërë në mënyrë selektive, çdo drejtësi e bërë me shënjestër politike, është një drejtësi mafioze”, u shpreh Vasili.
Ai shtoi se edhe kundërshtarët politikë duhet të kenë garanci të plota procedurale dhe proces të drejtë gjyqësor.
Në deklaratën e tij, Vasili kritikoi gjithashtu mënyrën se si janë publikuar materiale dhe informacione gjatë hetimeve ndaj Metës, duke pretenduar se është krijuar një klimë paragjykimi publik përpara nisjes së procesit në themel.
