Partia Demokratike po përpiqet të konsolidojë radhët e saj përballë sfidave politike, duke dhënë sinjale bashkimi përtej dallimeve të brendshme. Kjo u reflektua edhe në takimin e zhvilluar në Kombinat, ku vijoi turi i Foltores dhe ku u përcoll një mesazh i qartë për unitet dhe mobilizim.
Në këtë takim mori fjalën edhe Ilir Alimehmeti, kryetar i këshilltarëve bashkiakë të PD në Këshillin Bashkiak të Tiranës, i cili më herët kishte qenë i pranishëm edhe në takimet e zhvilluara nga Ervin Salianji. Prania e tij në të dyja aktivitetet u interpretua si një sinjal për afrimin e qëndrimeve dhe bashkimin e energjive brenda partisë.
Alimehmeti kritikoi ashpër qeverinë dhe politikat shtetërore, duke u ndalur te problemet që, sipas tij, po prekin drejtpërdrejt qytetarët, veçanërisht në zonën e Kombinatit. Ai theksoi se banorët rrezikojnë të humbasin banesat për t’i hapur rrugë projekteve të reja ndërtimi dhe e cilësoi këtë si një qasje që dëmton komunitetin.
Në fjalën e tij, Alimehmeti u shpreh se vendi është përfshirë nga fenomene të rënda si krimi dhe largimi masiv i të rinjve, duke theksuar nevojën për reagim politik dhe qytetar. Ai bëri thirrje për pjesëmarrje në protestën e paralajmëruar më 24 janar, duke e konsideruar atë si një moment kyç për opozitën.
Duke folur për strukturat e Partisë Demokratike, Alimehmeti theksoi se ato janë shtylla kryesore e partisë dhe lidhja direkte me qytetarët. Sipas tij, forca e PD-së nuk matet vetëm me numra, por me besimin dhe mesazhin që ajo përcjell. “Fitorja është e përbashkët, pavarësisht se mund të kemi mendime të ndryshme”, ishte mesazhi përmbyllës, duke nënvizuar se bashkimi është çelësi për suksesin politik të opozitës.
