Pas Metës, Berisha “qeras” dhe Mediun, ja deputetët që i bashkohen PR për grup parlamentar Mesila Doda “distancohet’…

Mesila Doda do të jetë deputete e pavarur në Kuvend, duke ‘tradhtuar’ kështu kreun demokrat Sali Berisha. Në zgjedhjet parlamentare të 11 majit, kreu i PD u dha aleatëve vende në listat e sigurta, duke shpërblyer edhe kreun e PDIU-së, Shpëtim Idrizin. Por, deputetja e tij ka zgjedhur që të jetë e pavarur në Kuvend, duke refuzuar t’iu bashkohet 3 grupeve parlamentare opozitare. Nën siglën e PD-së, Mesila Doda garoi në listën e mbyllur të Tiranës, duke fituar automatikisht vendin si deputete. Por, në ndryshim nga aleatët e tjerë, të cilët i kanë marrë PD deputetë hua për të formuar grupe parlamentare, burimet i thanë gazetës “SOT” se ajo do të jetë deputete e pavarur. Shenjën e parë të distancimit, Mesila Doda e dha në seancën e dy dite më parë në Kuvend, ku mori pjesë në votim për kryesinë e komisioneve kuvendore, edhe pse opozita braktisi sallën. Ndërkohë pasi i bëri qokën e radhës presidentit të Partisë së Lirisë, Ilir Meta, kryetari i Partisë Demokratike, Sali Berisha nuk ka harruar as aleatin historik , kreun e Partisë Republikane, Fatmir Mediu, duke e qerasur me deputetët, në mënyrë që PR të ketë grupin e saj parlamentar. Kështu gazeta “SOT” ka mësuar se kreu i grupit do të jetë Fatmir Mediu, ndërsa për të formuar grupin, për të cilin duhen 7 deputetë, i janë bashkuar Vangjel Dule nga PBDNJ, Artan Luku PAA, Greta Bardeli nga PD, Denisa Vata nga PD, Zija Ismaili nga PD dhe Fidel Kreka nga PD.