Kuvendi i Shqipërisë zhvilloi seancën e radhës plenare mes debateve të forta politike lidhur me kërkesën e opozitës për interpelancë urgjente me kryeministrin Edi Rama mbi projektin “Smart City”.
Në nisje të seancës, kryetari i Kuvendit, Niko Peleshi, njoftoi se kërkesa e grupit parlamentar të Partia Demokratike nuk ishte pranuar, pasi sipas tij nuk përmbushte kriteret kushtetuese për një interpelancë urgjente.
“Objekti nuk lidhet drejtpërdrejt me një veprim apo mosveprim konkret të Këshillit të Ministrave, por mbështetet në raportime mediatike, emisione investigative dhe pretendime nga palë të treta. Kërkesa nuk përmbush natyrën dhe qëllimin kushtetues,” deklaroi Peleshi.
Pas këtij vendimi reagoi deputeti demokrat Klevis Balliu, i cili e cilësoi mungesën e kryeministrit në sallën e Kuvendit si “politikisht të pajustifikueshme”.
“Është e disata interpelancë që Edi Rama vijon të mos jetë në këtë sallë. Interpelancat nuk janë çështje qejfi, ai ka detyrim të paraqitet,” u shpreh Balliu.
Deputeti i opozitës tha se çështja e “Smart City” nuk lidhet thjesht me instalimin e kamerave të sigurisë, por sipas tij me ngritjen e një sistemi të gjerë monitorimi dhe survejimi.
“Kemi të bëjmë me krijimin e një ekosistemi survejimi. Objektivi fillestar janë shkollat. Po ndërtohet një sistem monitorimi inteligjent që prek edhe të miturit,” deklaroi ai.
Balliu ngriti gjithashtu shqetësime për aspektin e sigurisë kombëtare, duke pretenduar se sistemi po ndërtohet në bashkëpunim me kompani ndaj të cilave, sipas tij, ka pasur shqetësime nga institucionet amerikane për lidhje me aparatin kinez të inteligjencës dhe survejimit.
“Kjo është çështje e sigurisë kombëtare dhe Rama fshihet,” përfundoi deputeti demokrat.
Debati për projektin “Smart City” është kthyer në një tjetër pikë përplasjeje mes mazhorancës dhe opozitës, ndërsa PD kërkon më shumë transparencë mbi teknologjitë e përdorura dhe kompanitë e përfshira në zbatimin e projektit.
