Kreu i Partisë Demokratike, Sali Berisha, ka zhvilluar një takim me kryetarët e degëve të PD-së në të gjithë vendin, në kuadër të përgatitjeve për protestën kombëtare të thirrur më 24 janar.
Në fjalën e tij, Berisha ka lëshuar akuza të forta ndaj kryeministrit Edi Rama dhe qeverisë së tij, duke e cilësuar Ramën si “padrino të një organizate kriminale”, që sipas tij nuk respekton ligjin, Kushtetutën dhe asnjë parim themelor të shtetit të së drejtës.
Ai deklaroi se rrethi i ngushtë i kryeministrit përbëhet nga, siç u shpreh, “hajdutë profesionistë”, të cilët kanë përvetësuar në mënyrë sistematike paratë publike pa asnjë kufi.
Berisha pretendoi gjithashtu se qytetarët shqiptarë nuk janë të vetëdijshëm për përmasat reale të grabitjes së taksave. Sipas tij, nga rreth 67 miliardë euro të mbledhura nga taksat e qytetarëve ndër vite, një pjesë dërrmuese, deri në 90 apo edhe 100 për qind, është përvetësuar nga qeveria dhe klientët e saj.
Në vijim, kreu i PD-së akuzoi drejtpërdrejt Ramën se ka urdhëruar hakerimin e dosjeve të SPAK, me qëllim, sipas tij, kontrollin dhe pengimin e drejtësisë për çështje që implikojnë zyrtarë të lartë të qeverisë.
Ai u bëri thirrje kryetarëve të degëve të PD-së që të mobilizohen maksimalisht për protestën e 24 janarit, duke e cilësuar atë si një hap të domosdoshëm për të kërkuar llogaridhënie, drejtësi dhe për t’i dhënë fund, sipas tij, një regjimi të kapur nga korrupsioni dhe krimi i organizuar.
Berisha e përshkroi situatën në vend si “tragjike” dhe theksoi se shqiptarët duhet të ndërgjegjësohen për përmasat e vërteta të korrupsionit dhe kontrollit të financave publike nga qeveria aktuale.
