Kreu i Partisë Demokratike, Sali Berisha, ka paralajmëruar një përballje të fortë politike në protestën e 24 janarit, duke deklaruar se opozita nuk do të largohet nga sheshi deri në realizimin e qëllimit të saj. Gjatë fjalës së mbajtur në Foltoren e radhës në Tiranë, Berisha theksoi se beteja kundër qeverisë së Edi Ramës ka hyrë në fazën vendimtare.
Sipas tij, protesta e së shtunës do të jetë një kryengritje paqësore, e mbështetur në guximin, energjinë dhe vendosmërinë e qytetarëve. Berisha nënvizoi se Partia Demokratike ka fituar çdo betejë pa dhunë dhe se edhe këtë herë qëndrimi do të jetë paqësor, por i palëkundur.
“Jemi në kilometrin e fundit të misionit tonë. Këtë herë nuk do ta lëshojmë sheshin deri në realizimin e qëllimit,” u shpreh Berisha, duke e cilësuar 24 janarin si një ditë përcaktuese për fatin politik të vendit.
Lideri i opozitës deklaroi se, sipas tij, qeveria aktuale nuk ka më forcë për të qëndruar në pushtet përballë presionit qytetar dhe akuzave për korrupsion dhe lidhje kriminale. Ai u bëri thirrje demokratëve dhe qytetarëve të bashkohen në shesh, duke theksuar se vetëm ata që i qëndrojnë besnikë të vërtetës dhe janë të gatshëm të sakrifikojnë për të, dalin gjithmonë fitues.
“Betejën tonë nuk do ta ndërpresim dhe pushteti nuk mund t’i rezistojë më energjisë së qytetarëve,” përfundoi Berisha, duke e cilësuar protestën si një moment historik për opozitën dhe Shqipërinë.
