Seanca e sotme plenare në Kuvend, e fundit për këtë vit, u mbyll pas vetëm një ore, mes kaosit, tensioneve dhe përplasjeve të forta politike. Deputetët e Partisë Demokratike bllokuan vendet e ministrave socialistë, duke paralizuar zhvillimin normal të punimeve parlamentare.
Gjatë kësaj ore, salla e Kuvendit u shndërrua në arenë përplasjesh: deputetë të PD u konfrontuan me Gardën e Republikës, u hodhën flakadanë, kartona dhe shishe uji, ndërsa pankarta kundër zv.kryeministres Belinda Balluku u shpalosën në sallë.
Opozita kërkoi me insistim praninë në Kuvend të Belinda Ballukut, e marrë e pandehur për shkelje të barazisë në tendera dhe për të cilën SPAK ka kërkuar autorizim nga Parlamenti për arrestim. Sipas demokratëve, pa sqarimet e saj nuk mund të ketë normalitet parlamentar.
Për shkak të tensioneve të vazhdueshme, deputetët Klevis Balliu dhe Flamur Noka u përjashtuan nga seanca. Ndërkohë, në mes të kaosit, Endrit Shabani u betua si Avokat i Popullit – një proces i pazakontë që u zhvillua mes thirrjeve, zhurmës dhe bllokimit të sallës. Teksa largohej, Shabani përshëndeti deputetët e opozitës me puthje, një gjest që u komentua gjerësisht.
Nga ana tjetër, kreu i grupit parlamentar socialist, Taulant Balla, ironizoi situatën dhe sjelljen e opozitës, duke deklaruar se shpreson që kjo skenë të motivojë mbështetësit e PD-së që të shtohen në protestën e paralajmëruar për ditën e hënë.
“Në vlerësim të kësaj pamjeje të paralajmëruar, me shpresën se do të motivohen mbështetësit e PD për të kaluar nga 300 në 400 protestues, dhe në respekt të procedurës, duke qenë se opozita nuk lejon zhvillimin e seancës, propozoj kalimin e menjëhershëm të rendit të ditës për votim”, deklaroi Balla.
Pas këtij propozimi, maxhoranca kaloi rendin e ditës direkt në votim dhe seanca u mbyll. Situata u bë edhe më kaotike pasi sinjali i transmetimit për mediat u ndërpre, për shkak se fibra e transmetimit jashtë Kuvendit u përfshi nga zjarri.
Me përplasje brenda dhe incidente jashtë sallës, Kuvendi e mbylli vitin parlamentar mes tensioneve më të forta politike të muajve të fundit, duke lënë të hapur një përballje edhe më të ashpër në javët në vijim.
