Kryetari i Kuvendit, Niko Peleshi, ka hyrë hapur në përplasje me Prokurorinë e Posaçme, duke refuzuar thirrjen e mbledhjes së dytë të Këshillit të Mandateve dhe Imunitetit për shqyrtimin e kërkesës së SPAK për heqjen e imunitetit dhe autorizimin e arrestimit të zv/kryeministres Belinda Balluku.
Prokuroria e Posaçme ka argumentuar se Balluku ka rrezik real për intimidimin e dëshmitarëve dhe prishjen e provave, duke kërkuar veprim të shpejtë nga Kuvendi. Megjithatë, në vend që procedura parlamentare të ecë pa vonesa, Kryetari i Kuvendit ka vendosur të bllokojë procesin, duke mos caktuar datë për mbledhjen e radhës së Këshillit të Mandateve.
Refuzimi i mbledhjes së Këshillit të Mandateve
Deputetët e Partisë Demokratike, anëtarë të Këshillit të Mandateve dhe Imunitetit, kërkuan zyrtarisht thirrjen e mbledhjes së dytë për të vijuar shqyrtimin e kërkesës së SPAK. Përgjigjja e Peleshit ishte refuzuese, duke argumentuar se nuk është ezauruar ende koha e nevojshme për mbrojtjen e Ballukut që të njihet me aktet dhe provat e paraqitura nga SPAK.
Ky arsyetim konsiderohet i pajustifikuar, pasi nga mbledhja e parë e Këshillit kanë kaluar ditë të mjaftueshme që çdo palë të njihet me materialet voluminoze dhe të përgatisë qëndrimin e saj. Në praktikë, ky justifikim ka shërbyer vetëm si mjet për shtyrjen e vendimmarrjes.
Përdorimi i Gjykatës Kushtetuese si alibi
Si pjesë e së njëjtës skemë bllokuese, Niko Peleshi ka futur në lojë edhe Gjykatën Kushtetuese. Në përgjigjen e tij zyrtare, ai pretendon se Kuvendi duhet të presë vendimin e Kushtetueses, e cila ka marrë në shqyrtim ankimin e kryeministrit Edi Rama për një përplasje kompetencash të krijuar pas vendimit të GJKKO-së për pezullimin e Ballukut nga detyra.
Ky argument konsiderohet pa bazë ligjore, pasi procedura për heqjen e imunitetit është e pavarur nga gjykimi i Gjykatës Kushtetuese dhe nuk ka asnjë pengesë që Këshilli i Mandateve të vijojë punën e tij. Përfshirja e Kushtetueses shihet si një alibi politike për të ngrirë procesin parlamentar dhe për të mbrojtur një ministre nën hetim penal.
Akuzat ndaj Ballukut dhe roli i Kuvendit
Belinda Balluku po hetohet për shkelje të barazisë në tenderin e tunelit të Llogarasë dhe për dhjetëra tenderë të tjerë, me një dëm të dyshuar që arrin në rreth 1.1 miliardë euro. Pavarësisht kësaj, Kuvendi po shndërrohet në një filtër politik përballë drejtësisë, duke vonuar apo bllokuar kërkesat e SPAK.
Çfarë ka ndodhur deri tani
Pas vendimit të Gjykatës Kushtetuese për pezullimin e vendimit të GJKKO-së dhe rikthimin e Ballukut në detyrë më 12 dhjetor, SPAK iu drejtua Kuvendit me kërkesë për heqjen e imunitetit dhe autorizimin e arrestimit të saj.
Mbledhja e parë e Këshillit të Mandateve dhe Imunitetit u zhvillua më 19 dhjetor, me pjesëmarrjen e pesë deputetëve nga shumica dhe pesë nga opozita, si dhe tre prokurorëve të posaçëm. SPAK dorëzoi një USB me mbi 10 mijë faqe prova, të cilat iu shpërndanë të gjithë anëtarëve të këshillit.
Anëtarët e opozitës kërkuan që mbledhja e radhës të mbahej brenda afatit ligjor 5-ditor, ndërsa pas një pushimi 20-minutësh, Kryetari i Këshillit, Niko Peleshi, refuzoi të caktojë një datë konkrete për seancën pasuese.
Kuvendi si “zyrë mbrojtjeje”
Me këto veprime, Peleshi po akuzohet se ka kthyer zyrën e Kryetarit të Kuvendit në një zyrë mbrojtjeje politike për Belinda Ballukun, duke bllokuar funksionimin normal të Këshillit të Mandateve dhe Imunitetit dhe duke vendosur interesin politik mbi kërkesat e drejtësisë.
