Të gjitha elementët e dosjes që rëndojnë mbi Flamur Nokën, i njohur si “Muli”, tregojnë për një skemë të dyshuar abuzimi me pushtetin, që shtrihet në disa vite dhe përfshin kontrata publike, pasuri luksoze dhe përfitime familjare nga fondet shtetërore.
Sipas burimeve pranë hetimit, çështja nuk kufizohet vetëm te koncesioni i pasaportave biometrike, i cili u ka kushtuar qytetarëve shqiptarë mbi 500 milionë euro, por shtrihet edhe në veprimtarinë e Nokës në Entin Kombëtar të Banesave, ku dyshohet se ka përdorur funksionin publik për të favorizuar familjarë të tij në dëm të kategorive të varfra.
Hetimet kanë ngritur dyshime serioze mbi mënyrën se si janë përfituar banesa sociale në Sarandë nga persona të lidhur familjarisht me Nokën, të cilët nuk rezultojnë përfitues legjitimë sipas kritereve ligjore. Këto raste konsiderohen si një nga provat më të forta të dyshuara për shpërdorim detyre dhe përfitim të paligjshëm.
Paralelisht, hetimi pasuror ka vënë në fokus blerjen e pasurive të paluajtshme në zona elitare të Tiranës dhe në bregdet, me vlera reale shumë herë më të larta se ato të deklaruara. Burimet financiare të deklaruara nga Noka dhe familja e tij nuk justifikojnë këto investime, duke forcuar dyshimet për pastrim parash dhe fshehje pasurie.
Një element tjetër që rëndon dosjen është përfitimi i një kredie me zero interes si “i pastrehë”, në një kohë kur vetë Noka ishte pjesë e strukturave drejtuese të Entit Kombëtar të Banesave. Ky veprim, sipas juristëve, përbën konflikt të pastër interesi dhe shkelje të rëndë të ligjit.
Burime pranë hetimit bëjnë me dije se dosja ndodhet në fazë të avancuar verifikimi dhe pritet të zbardhë nëse kemi të bëjmë me një skemë të organizuar korrupsioni, ku pushteti politik është përdorur sistematikisht për pasurim personal dhe familjar.
Nëse këto dyshime konfirmohen, Flamur Noka do të përballet me një nga goditjet më të forta ligjore dhe politike të karrierës së tij, ndërsa rasti pritet të ketë ndikim të fortë edhe në klimën politike brenda Partisë Demokratike.
