Ministria për Evropën dhe Punët e Jashtme (MEPJ) ka lëshuar një paralajmërim zyrtar për qytetarët lidhur me një faqe mashtruese që po qarkullon në internet dhe që imiton shërbimin e aplikimit për viza në Shqipëri.
Sipas njoftimit, është identifikuar një faqe e paautorizuar që përmban materiale dhe informacion të ngjashëm me portalin zyrtar të vizave elektronike. Autoritetet theksojnë se kjo faqe nuk ka asnjë lidhje me institucionet shtetërore dhe mund të përdoret për mashtrime apo përfitime të paligjshme.
Ministria bën të qartë se i vetmi portal zyrtar për aplikim për vizë elektronike është platforma shtetërore, dhe çdo aplikim duhet të kryhet vetëm përmes saj, për të shmangur rrezikun e abuzimeve.
Në të njëjtën kohë, autoritetet e sigurisë kibernetike dhe organet ligjzbatuese kanë nisur veprimet për identifikimin dhe bllokimin e aktivitetit të paligjshëm, si dhe për ndjekjen e personave përgjegjës.
MEPJ u bën thirrje qytetarëve dhe të interesuarve të tregojnë kujdes maksimal dhe të verifikojnë gjithmonë burimet online, duke përdorur vetëm faqet zyrtare për informacione dhe aplikime që lidhen me vizat.
