Prokuroria e Posaçme (SPAK) ka kërkuar 14 vite burg për biznesmenin Pëllumb Gjoka në kuadër të operacionit “Metamorfoza”, ndërsa për ish-shefin e policisë Ardit Hasanbegaj është kërkuar dënimi me 9 vite burg. Çështja po gjykohet me procedurë të shkurtuar, çka nënkupton se në rast shpalljeje fajtor, të pandehurit përfitojnë ulje me 1/3 të dënimit.
Seanca e radhës është caktuar më 9 mars, kur priten konkluzionet e mbrojtjes.
Sipas pretencës së SPAK:
- Pëllumb Gjoka akuzohet për sigurim kushtesh për vrasje, armëmbajtje pa leje, pjesëmarrje në grup kriminal dhe korrupsion;
- Behar Brahoviç (Bajri) përballet me kërkesë për 15 vite burg;
- Edmond Preka me 11 vite;
- Astmer Bilali me 10 vite;
- Ardit Hasanbegaj me 9 vite;
- Xhevahir Lita me 6 vite;
- Oltion Bistri me 9 vite burg.
Gjoka u arrestua në korrik 2023, ndërsa hetimet mbështeten edhe në komunikime të siguruara nga aplikacioni Sky ECC, të cilat janë konsideruar të vlefshme nga Gjykata Kushtetuese pas ankimit të tij.
