Përshkallëzimi i protestës së opozitës në Tiranë ka gjetur jehonë të gjerë në mediat gjermane, të cilat raportojnë për përplasje mes demonstruesve dhe policisë, si dhe për kërkesat për dorëheqjen e zëvendëskryeministres Belinda Balluku.
Portali “Tagesschau” i ARD shkruan për trazira gjatë protestave në Tiranë, duke theksuar se mijëra qytetarë u mblodhën për të kërkuar largimin e Ballukut, e cila përballet me akuza për korrupsion që ajo i mohon. Sipas raportimit, disa protestues hodhën molotovë drejt një ndërtese qeveritare, ndërsa policia ndërhyri me ujë me presion.
Edhe “Die Zeit” i kushton vëmendje zhvillimeve, duke nënvizuar se gjatë përplasjeve u plagosën efektivë policie dhe pati të arrestuar. Gazeta thekson se qeveria e kryeministrit Edi Rama po përballet me kritika të forta për shkak të hetimeve ndaj zëvendëskryeministres dhe debatit për heqjen e imunitetit të saj parlamentar.
Portale të tjera si NTV dhe raportime nga media publike gjermane vënë në dukje se protestat janë pjesë e një serie demonstratash që kanë rritur tensionet politike në vend. Sipas tyre, qytetarët janë të zemëruar për shkak të akuzave për korrupsion dhe kërkojnë përgjegjësi politike.
Radioja “Deutschlandfunk” raporton se pas fjalimit të liderit të opozitës, demonstruesit hodhën molotovë dhe gurë, ndërsa policia u kundërpërgjigj me gaz lotsjellës dhe ujë me presion. Media gjermane thekson se të dy kampet politike akuzojnë njëri-tjetrin për korrupsion, ndërsa një komision parlamentar pritet të shqyrtojë kërkesën për heqjen e imunitetit të Ballukut.
Protestat në Tiranë vijojnë të jenë në fokus të mediave ndërkombëtare, duke reflektuar tensionet e larta politike dhe debatin mbi çështjet e korrupsionit dhe stabilitetit institucional në vend.
