Një sulm i rëndë me armë zjarri ka tronditur Universitetin prestigjioz Brown në shtetin e Rhode Island, ku dy studentë kanë humbur jetën dhe nëntë persona të tjerë janë plagosur, disa prej tyre në gjendje kritike.
Sipas autoriteteve amerikane, sulmi ndodhi rreth orës 16:00 me kohën lokale, kur një person i armatosur hapi zjarr brenda një klase në ndërtesën e inxhinierisë Barus and Holley, në pjesën lindore të kampusit. Në atë moment, në ambientet e universitetit po zhvilloheshin provimet përfundimtare, çka e bëri situatën edhe më dramatike.
Zyrtarët e Spitalit të Rhode Island konfirmuan se shumica e të plagosurve ndodhen në gjendje të rëndë, por të stabilizuar. Spitali është futur në regjim izolimi, për shkak se autori i sulmit ende nuk është arrestuar.
Autoritetet kanë vendosur urdhër për qëndrim në ambiente të mbyllura për zonën përreth universitetit, ndërsa FBI dhe policia lokale po zhvillojnë një operacion të gjerë kërkimi.
Presidentja e Universitetit Brown, Christina Paxson, reagoi e tronditur pas ngjarjes:
“Ky është një moment që shpresonim të mos vinte kurrë për komunitetin tonë. Është thellësisht shkatërrues për të gjithë ne.”
Ndërkohë, FBI ka publikuar pamje nga kamerat e sigurisë, ku autori shihet duke dalë nga ndërtesa pas sulmit. Në video nuk dallohet qartë fytyra e tij dhe as arma që dyshohet se ka përdorur.
Identitetet e viktimave dhe të të plagosurve nuk janë bërë ende publike, ndërsa hetimet vijojnë për të zbardhur motivet e sulmit dhe kapjen e autorit.
