Një ngjarje e rëndë është shënuar mesditën e sotme në zonën e Qafës së Llogarasë, ku një automjet është përfshirë nga flakët, duke shkaktuar humbjen e jetës së drejtuesit të mjetit.
Sipas informacioneve paraprake nga policia, shoferi nuk ka mundur të dalë në kohë nga automjeti dhe ka humbur jetën si pasojë e zjarrit, duke u djegur brenda në sediljen e drejtuesit. Viktima ende nuk është identifikuar.
Ngjarja është raportuar rreth orës 14:35, moment kur shërbimet e Policisë së Vlorës janë njoftuar dhe janë nisur menjëherë drejt vendngjarjes. Në zonë kanë mbërritur gjithashtu edhe shërbimet zjarrfikëse për shuarjen e flakëve.
Deri në këto momente, shkaqet e rënies së zjarrit mbeten të paqarta. Grupi hetimor ndodhet në vendngjarje dhe po punon për identifikimin e viktimës, si dhe për zbardhjen e plotë të rrethanave që çuan në këtë ngjarje tragjike.
Autoritetet pritet të japin informacione të tjera në vijim, ndërsa zona është vënë nën kontroll për arsye sigurie.
