Adriatik Lapaj ka vijuar takimet me qytetarët jashtë vendit, ku ka folur për situatën politike në Shqipëri dhe për organizimin e protestave të Lëvizjes “Shqipëria Bëhet”.
Gjatë një takimi në Piacenza, Itali, Lapaj theksoi rolin e emigrantëve në zhvillimet politike në vend, duke e cilësuar mbështetjen e tyre si thelbësore për ndryshimin që, sipas tij, kërkon lëvizja që drejton.
Ai bëri të ditur se protesta e radhës do të mbahet më 1 mars, duke shtuar se kjo do të jetë protesta e pestë radhazi. Lapaj deklaroi se pjesëmarrja në tubime është vullnetare dhe jo e organizuar përmes pagesave apo “biletave”, siç ironizoi ai në fjalën e tij.
Kreu i “Shqipëria Bëhet” u shpreh se lëvizja e tij është tashmë forca e tretë politike në vend, vetëm pak muaj pas krijimit, dhe synon të zgjerojë mbështetjen për t’u kthyer në një alternativë qeverisëse.
Ai u bëri thirrje qytetarëve që të mos votojnë “për tifozllëk”, por të mbështesin, sipas tij, figura të reja dhe të pakorruptuara në politikë.
