Familja e Martin Canit ka reaguar sot pas vendimit të Gjykatës së Tiranës, e cila dënoi me 16 vite burg Marjo Përlleshajn, autorin e vrasjes së 14-vjeçarit një vit më parë pranë gjimnazit “Fan Noli”.
Në deklaratën e tyre, familjarët shprehen se ndonëse asnjë vendim nuk ua sjell dot djalin në jetë, sot ata panë “për herë të parë një rreze të fortë drejtësie”.
“Vendim kurajoz dhe i drejtë – jeta e Martinit mori dinjitetin që meriton”
Familja Cani vlerëson se gjykata njohu atë që ata e kanë theksuar që në fillim: se kemi të bëjmë me dy vepra të ndara penale — vrasjen e Martinit dhe tentativën për vrasje ndaj shokut të tij, Luisit.
“Ky vendim nuk na e kthen dot Martinin, por na jep një ndjenjë të thellë se dhimbja jonë nuk u shpërfill dhe se jeta e tij u trajtua me peshën dhe dinjitetin që meriton.”
Ata falënderuan gjyqtarët për profesionalizmin dhe integritetin:
“Gjykata zgjodhi të shihte të vërtetën, jo rrugën e lehtë procedurale.”
“Sot, Martini është më i gjallë se kurrë në ndërgjegjen e shoqërisë”
Në deklaratë, familja njofton tre nisma që do të mbajnë gjallë kujtimin dhe mesazhin e 14-vjeçarit:
- Muzeu “Martin Cani”, një hapësirë edukimi dhe reflektimi.
- Një film mbi jetën dhe ëndrrën e tij për futbollin.
- Fondacioni “Martin Cani”, i cili do të punojë për sigurinë e fëmijëve në shkolla.
“Sot, drejtësia foli me zë të qartë për Martin Canin.
Sot, Martini është më i gjallë se kurrë në ndërgjegjen e shoqërisë.”
Familja falënderoi të gjithë qytetarët që i kanë mbështetur gjatë një viti të mbushur me dhimbje, betejë dhe pritje për drejtësi.
