Kryeministri Edi Rama zyrtarizoi të hënën një nismë ligjore për ndryshimin e nenit 242 të Kodit të Procedurës Penale, që synon t’i heqë gjykatave të drejtën për të pezulluar nga detyra disa funksione të larta kushtetuese. Sipas raportimit të BIRN, kjo lëvizje vjen si kundërpërgjigje ndaj pezullimit nga detyra të zëvendëskryeministres Belinda Balluku nga Gjykata e Posaçme.
Në mbledhjen e grupit parlamentar të Partisë Socialiste, u bë e ditur se drafti parashikon që masa e pezullimit të mos zbatohet për:
- Kryeministrin
- Zëvendëskryeministrin
- Ministrat
- Presidentin e Republikës
- Avokatin e Popullit
- Kreun e KLSH-së
- Anëtarët e Gjykatës Kushtetuese
Ndryshimi i propozuar zgjeron përjashtimin ekzistues, i cili deri më tani vlente vetëm për “personat e zgjedhur sipas ligjit elektoral”.
Qëndrimi i Ramës
Kryeministri këmbënguli se nisma nuk lidhet me rastin konkret të Ballukut, por me parimin e ndarjes së pushteteve.
“Kush e lidh me rastin konkret bën gabim… Por pezullimi është i papranueshëm, dhe për këtë arsye ne do merremi me pezullimin për ta refuzuar me vullnetin e shumicës në Kuvend ndërhyrjen në territorin kushtetues të pushtetit ekzekutiv,” u shpreh Rama.
Kritikat dhe reagimet
Sipas BIRN, ekspertë dhe analistë e shohin ndërhyrjen si një hap që shkon në kundërshtim me retorikën për luftë kundër korrupsionit dhe si një zgjerim praktik të imunitetit për anëtarët e qeverisë.
Kreu i Partisë Demokratike, Sali Berisha, reagoi duke e cilësuar draftin si një goditje ndaj procesit të integrimit europian.
“Rama i mbylli dyert integrimit të Shqipërisë në Bashkimin Europian… ai dhe ministrat e tij qëndrojnë mbi ligjin,” deklaroi Berisha.
Ndërkohë, ish-ministri i Drejtësisë, Ulsi Manja, sqaroi se bëhet fjalë për një ndërhyrje procedurale në Kodin e Procedurës Penale dhe jo për zgjerim imuniteti kushtetues, duke theksuar se subjektet mbeten të hetueshme dhe të ndjekshme penalisht.
Nisma vjen në një moment tensioni mes mazhorancës dhe institucioneve të drejtësisë, pas vendimit të Gjykatës Kushtetuese që rrëzoi për mungesë kuorumi pretendimin e Ramës për pavlefshmëri të pezullimit të Ballukut.
