Kryeministri i Estonia, Kristen Michal, shprehu mbështetjen e vendit të tij për rrugëtimin europian të Albania gjatë një deklarate të përbashkët me kryeministrin Edi Rama.
Michal theksoi se Estonia ka mbështetur vazhdimisht procesin e integrimit të Shqipërisë në Bashkimin Europian dhe kërkoi vijimin e reformave.
“Estonia mbështet fort zgjerimin e BE-së. Kemi mbështetur Shqipërinë në rrugëtimin drejt BE-së dhe do të vazhdojmë ta bëjmë këtë. Vazhdoni të ecni përpara me reforma për të ardhmen e vendit dhe popullit tuaj. Nëse Shqipëria përmbush angazhimet e saj, atëherë edhe BE do të bëjë të njëjtën gjë”, deklaroi ai.
Kryeministri estonez u ndal edhe te bashkëpunimi ekonomik dhe teknologjik mes dy vendeve, duke vlerësuar rëndësinë e fluturimeve direkte për turizmin dhe biznesin.
Sipas tij, Estonia dhe Shqipëria ndajnë interesa të përbashkëta në fushën e teknologjisë, digjitalizimit dhe inteligjencës artificiale.
“Përvoja e Estonisë si vend dixhital tregon se teknologjia mund të reduktojë burokracinë dhe të përmirësojë shërbimet publike. Nisma jonë e re për inteligjencën artificiale është një investim i rëndësishëm për të ardhmen e ekonomisë”, u shpreh Michal.
Ai bëri edhe një koment simbolik për nismat shqiptare në teknologji, duke ironizuar pozitivisht se Estonia duhet të “ecë më shpejt” për të arritur Shqipërinë në këtë aspekt.
“Shqipëria ka një ministre për AI, Estonia duhet të ecë që t’ju kapë aty”, tha ai.
Në fund të deklaratës, kryeministri estonez kujtoi se vitin e ardhshëm dy vendet do të shënojnë 25-vjetorin e marrëdhënieve diplomatike, duke shprehur bindjen se bashkëpunimi mes tyre do të forcohet më tej.
