Zgjedhjet e parakohshme parlamentare në Kosovë po zhvillohen sot, me rreth 1.9 milionë qytetarë me të drejtë vote. Autoritetet zgjedhore bëjnë të ditur se procesi po ecën normalisht dhe pa incidente serioze.
Kreu i Komisionit Qendror të Zgjedhjeve ka deklaruar se gjatë ditës janë shënuar disa ndërprerje të energjisë elektrike në qendra të caktuara votimi, por këto raste kanë qenë të përkohshme dhe janë zgjidhur brenda një kohe të shkurtër.
Sipas tij, procesi i votimit nuk është ndalur në asnjë moment dhe janë marrë masa që qytetarët të mos votojnë në kushte të papërshtatshme. Edhe pse jo të gjitha qendrat janë të pajisura me gjeneratorë, ekipet përgjegjëse kanë ndërhyrë menjëherë për të garantuar vijimin e votimit.
Autoritetet zgjedhore theksojnë se integriteti i votës mbetet prioritet dhe se do të vazhdojnë monitorimin gjatë gjithë ditës për të siguruar një proces të qetë, të rregullt dhe demokratik.
