Komisioni Evropian ka reaguar zyrtarisht pas deklaratave të fundit lidhur me ndalimin e fondeve për Serbia, duke theksuar se nuk ekziston asnjë vendim formal për ngrirjen e tyre.
Zëdhënësi i Komisionit, Markus Lammers, sqaroi se procesi i vlerësimit të kushteve për dhënien e fondeve është i vazhdueshëm dhe pjesë normale e mekanizmave të Bashkimit Evropian. “Nuk ka asnjë vendim për t’i ngrirë fondet”, deklaroi ai, duke shtuar se çdo pagesë lidhet drejtpërdrejt me përmbushjen e reformave të kërkuara.
Reagimi vjen pasi komisionerja për Zgjerim, Marta Kos, kishte deklaruar më herët se pagesat nga Plani i Rritjes ishin pezulluar për shkak të regresit në fushën e drejtësisë në Serbi. Kjo ka krijuar paqartësi mbi statusin real të fondeve.
Sipas Komisionit, shqetësimet kryesore lidhen me ligjet e reja për gjyqësorin në Serbi, të cilat, sipas vlerësimeve të Komisioni i Venecias, kanë dobësuar pavarësinë e prokurorisë. BE kërkon që Beogradi të zbatojë plotësisht rekomandimet e këtij institucioni dhe të rishikojë legjislacionin në fjalë.
Në kuadër të Planit të Rritjes për Ballkanin Perëndimor, Serbia përfiton rreth 1.588 miliardë euro për periudhën 2024–2027, në formën e granteve dhe kredive. Megjithatë, disbursimi i këtyre fondeve bëhet në bazë të progresit konkret në reforma.
Deri më tani, Serbia ka marrë një pjesë të fondeve, por më pak se sa ishte planifikuar, pasi nuk ka përmbushur të gjitha kushtet e kërkuara. Kjo tregon se, edhe pse fondet nuk janë ngrirë zyrtarisht, procesi mbetet i kushtëzuar nga ecuria e reformave dhe respektimi i standardeve evropiane.
