Gazetari Bledian Koka, i ftuar në një studio televizive, deklaroi se vendimi i Gjykatës Kushtetuese për të lënë në fuqi pezullimin nga detyra të Belinda Ballukut përbën një moment kyç që trondit jo vetëm qeverinë, por edhe gjithë sistemin politik në vend.
Sipas Kokës, ky nuk është thjesht një zhvillim juridik, por një përplasje e hapur mes pushtetit ekzekutiv dhe atij gjyqësor, me pasoja të thella politike dhe institucionale. Ai theksoi se reagimi i kryeministrit pas vendimit tregon se mazhoranca po përpiqet të ndryshojë legjislacionin për të krijuar hapësira të reja ligjore, me qëllim mbrojtjen e zyrtarëve të lartë.
Koka u shpreh se mënyra se si qeveria po e interpreton vendimin e Kushtetueses nuk buron nga logjika juridike, por nga frika politike. Sipas tij, kërkesa e kryeministrit për të “mbyllur boshllëqe ligjore” është në fakt përpjekje për të shmangur pasojat e drejtpërdrejta të vendimit.
Ai theksoi se Gjykata Kushtetuese ka marrë një vendim real dhe të fortë, gjë që provohet edhe nga reagimi i ashpër i Ramës menjëherë pas shpalljes së tij. Sipas Kokës, rrëzimi i kërkesës së kryeministrit për pezullimin e pezullimit tregon qartë se masa ndaj Ballukut është në fuqi.
Gazetari paralajmëroi se pezullimi ka afat tre mujor dhe se ekziston rreziku që, pas përfundimit të këtij afati, Balluku të rikthehet në detyrë nëse nuk ndërhyhet më tej. Në këtë kuadër, ai tha se kryeministri po “luan në hone të reja ligjore”, duke shpresuar që koha të punojë në favor të tij.
“Në këtë situatë, pavarësisht zhvillimeve ligjore, Belinda Balluku duhet të largohet menjëherë moralisht. Qëndrimi i saj në detyrë dëmton rëndë besimin publik dhe krijon një precedent të rrezikshëm për shtetin e së drejtës”, u shpreh Koka.
Ai përfundoi se kjo çështje do të jetë një test serioz për drejtësinë shqiptare dhe për aftësinë reale të institucioneve për të ushtruar kontroll mbi pushtetin politik.
