Sekretari i përgjithshëm i NATO-s, Mark Rutte, ka deklaruar se Shtetet e Bashkuara vazhdojnë ta mbështesin plotësisht NATO-n dhe do të mbeten të angazhuara si në Aleancë ashtu edhe në Evropë. Ai theksoi se nuk sheh arsye që Bashkimi Evropian të synojë pavarësi të plotë në fushën e mbrojtjes, por të forcojë kapacitetet e veta në bashkëpunim të ngushtë me SHBA-në.
Duke komentuar idenë që BE-ja të shndërrohet në një “NATO evropiane”, Rutte u shpreh se Uashingtoni pret rritje të shpenzimeve evropiane për mbrojtjen, por kjo duhet të bëhet në mënyrë të koordinuar dhe paralele me aleatët amerikanë. Sipas tij, mbështetja amerikane për Aleancën mbetet e plotë dhe e qëndrueshme.
Ai iu referua edhe angazhimeve të marra në samitet e NATO-s për rritjen e shpenzimeve të mbrojtjes, duke nënvizuar se objektivi për të arritur deri në 5% të Prodhimit të Brendshëm Bruto deri në vitin 2035 është një hap i rëndësishëm për forcimin e sigurisë kolektive. Rutte e cilësoi këtë si një nga arritjet kryesore në politikën e jashtme amerikane të viteve të fundit.
Sipas tij, Bashkimi Evropian ka një rol shumë të rëndësishëm brenda NATO-s, por vendet anëtare të BE-së që janë njëkohësisht edhe pjesë e Aleancës përfaqësojnë vetëm rreth një të katërtën e fuqisë totale ekonomike të NATO-s. Pjesa tjetër e madhe e kapaciteteve ekonomike dhe ushtarake vjen nga vendet jashtë BE-së, si Britania e Madhe, Norvegjia, Kanadaja dhe SHBA-të.
Nga ana tjetër, disa zëra në Evropë vazhdojnë të kërkojnë forcimin e autonomisë mbrojtëse të BE-së, duke argumentuar se ndryshimet në strategjinë globale të sigurisë dhe parimi “Amerika e Para” e bëjnë të domosdoshme ndërtimin e kapaciteteve më të pavarura evropiane. Megjithatë, Rutte këmbëngul se e ardhmja e sigurisë evropiane mbetet e lidhur ngushtë me NATO-n dhe partneritetin transatlantik.
