Brenda javës së ardhshme pritet të zyrtarizohet emri i drejtuesit të ri të Byrosë Kombëtare të Hetimit (BKH), institucioni që shpesh cilësohet si “FBI-ja shqiptare”. Pas përfundimit të procesit të përzgjedhjes nga Prokuroria e Posaçme (SPAK), kandidati fitues është shpallur Joni Keta, i cili ka dalë i pari në garën me shtatë kandidatë të tjerë.
SPAK ka përfunduar procedurat e konkursit dhe, sipas ligjit, emri i propozuar duhet t’i kalojë për votim Këshillit të Lartë të Prokurorisë (KLP), organi që ka fjalën e fundit për miratimin e drejtuesit të Byrosë.
KLP cakton datën: Vendimi merret më 9 dhjetor
Këshilli i Lartë i Prokurorisë ka njoftuar se më 9 dhjetor, në orën 11:00, do të zhvillojë mbledhjen zyrtare ku do të shqyrtojë propozimin e SPAK-ut dhe do të votojë për emërimin e drejtorit të ri të BKH-së.
Sipas rregullores dhe procedurës ligjore, KLP duhet të vendosë nëse do të miratojë kandidaturën e Joni Ketës për mandatin 5-vjeçar në krye të Byrosë Kombëtare të Hetimit.
Keta, fitues i garës mes 8 kandidatëve
Procesi i përzgjedhjes ka përfshirë testime profesionale, vlerësime të karrierës dhe intervista.
Në këtë procedurë, Joni Keta u rendit i pari mes 8 kandidaturave, duke siguruar vlerësimin më të lartë nga komisioni i posaçëm i SPAK.
Miratimi nga KLP do të zyrtarizojë drejtuesin e ri të një prej institucioneve më të rëndësishme të strukturës së drejtësisë, që ka rol kyç në hetimin e korrupsionit, krimit të organizuar dhe dosjeve të referuara nga SPAK.
