Kryeministri britanik, Keir Starmer, ka reaguar pas dorëheqjes së Wes Streeting nga posti i ministrit të Shëndetësisë, duke deklaruar se është “thellësisht i zhgënjyer” për largimin e tij nga qeveria.
Dorëheqja e Streeting u bë publike këtë të enjte dhe, sipas mediave britanike, shihet si një sinjal presioni ndaj Starmer pas rezultateve të dobëta të Partia Laburiste në zgjedhjet lokale.
Në letrën e tij të përgjigjes, Starmer falënderoi ish-ministrin për bashkëpunimin shumëvjeçar dhe kontributin e tij në rikthimin e laburistëve në pushtet.
“Kemi punuar së bashku për shumë vite dhe dua t’ju falënderoj për gjithë punën tuaj të palodhur, si për rikthimin tonë në qeveri, ashtu edhe për arritjet tuaja si ministër i Shëndetësisë”, shkroi Starmer.
Kryeministri britanik vlerësoi veçanërisht angazhimin e Streeting në përmirësimin e shërbimeve të National Health Service, duke theksuar se ai kontribuoi në adresimin e problemeve kryesore të sistemit shëndetësor britanik.
Starmer komentoi edhe humbjet e fundit të laburistëve në zgjedhjet lokale, ku partia humbi rreth 1.500 vende, kontrollin e Senedd në Uells dhe dhjetëra këshilla lokale në Angli.
“Rezultatet e zgjedhjeve lokale të javës së kaluar ishin jashtëzakonisht të vështira”, tha ai.
Në reagimin e tij, Starmer paralajmëroi gjithashtu për atë që e quajti “kërcënim real” nga kundërshtarët politikë të laburistëve ndaj vlerave dhe komuniteteve që përfaqëson partia.
“Të gjithë në parti e dimë shumë mirë se kundërshtarët tanë janë më të rrezikshëm se kurrë. Ata përbëjnë një kërcënim real për vlerat që mbrojmë, për komunitetet që përfaqësojmë dhe për vendin që duam”, u shpreh ai.
Në përfundim, kryeministri britanik theksoi se shpreson të vijojë bashkëpunimin me Streeting edhe brenda strukturave të partisë.
